Уганда улсын Лузира шоронд хоригдож буй хүмүүс олон үүрэг хариуцлагатай. Тухайлбал, тэд өөрсдийн идэх хүнсээ тариалж, хураан авч, бэлтгэн боловсруулаад шоронд буй хүмүүст жигд хуваан өгөх ёстой байдаг. Түүнчлэн сурч боловсроход тусгай анхаарал тавих ба хоригдлууд бие биедээ мэддэг чаддаг зүйлээ зааж өгдөг. Шоронгоос хөдөлмөрлөж сурсан хүмүүс дахин гэмт хэрэг үйлдэж, шоронд орох магадлал 30%-аас ч бага. Үүнийг Их Британийн 46%, АНУ-ын 76%-тай харьцуулахад Уганда улсын засан хүмүүжүүлэх төв ямар үр дүнтэй ажиллаж байгаа нь тодорхой биз ээ.

Испанийн Аранхуэс шоронд хоригдож буй бол өөрийн гэр бүлтэйгээ хамт амьдрах боломжтой юм. Уг шорон гэр бүлд зориулсан тохижилттой бөгөөд Диснейн сэдэвт чимэглэлтэй, хүүхдийн тоглоомын талбайтай байдаг. Энэ нь эцэг эхээ шоронд орсон, гэмт хэрэгтэн болсон гэх сэтгэхүйг хүүхдүүдэд өгөхгүй байх зорилготой гэнэ.

Нидерландын Виенхуйзен хот дахь Норгерхэйвен шоронд хүнд хэрэгтэй бүх юм нь өрөөнд нь бий. Ор, тавилга, хөргөгч, зурагт болон хувийн ариун цэврийн өрөө. Нидерландын шоронгуудын талаарх нэгэн сонирхолтой зүйл бол шоронд суух хүн “олддоггүй”-гээс болж эдийн засгийн хувьд хямралд ордог байна. Уг “асуудлыг” шийдэхийн тулд тус улсын Засгийн газар Норвеги улстай гэрээ хийж, тэндээс хоригдол импортолж байгаа ажээ. 

Норвеги улсын сул дэглэмтэй хамгийн том шорон бол Бастой юм. Бастой арал дээр байрлах энэхүү шоронд хүн амины хэрэг, хүчин зэрэг аймшигт гэмт хэрэг үйлдсэн хүмүүсийг “торны цаана” хэтэрхий тансаг амьдруулж байна хэмээх шүүмжлэл элбэг байдаг. Гэхдээ тус шоронгоос гарсан хүн эргэн ирэх магадлал маш бага, бүр Европт хамгийн бага байдаг билээ.

Колумб улсын Картагена хотын эмэгтэйчүүдийн шоронд хоригдож буй бүсгүйчүүд орой бүр тодорхой хэмжээний эрх чөлөөг эдэлдэг. Тэд тус шорондоо байрлах Интерно гэх ресторанд үйлчлэгч, тогооч, угаагч зэрэг ажил хийн олон нийтэд үйлчилдэг байна. Энд хоригдож буй хүмүүс ихэвчлэн хулгай, хар тамхи тээвэрлэсэн гэсэн гэмт хэрэг үйлдсэн байдаг аж.

Норвегийн чанга дэглэмтэй Халден шорон нь тус улсын хоёр дахь том шорон юм. Хоригдлуудыг засан хүмүүжүүлэх тал дээр хамгийн их анхаарал хандуулдаг уг шоронг хэтэрхий эрх чөлөөтэй газар хэмээн шүүмжилдэг байна. 

Өмнөх шоронгууд Эль Сальвадорын энэ шоронгийн дэргэд диваажин. Учир нь 3.5 метр өргөн, 4.5 метр өндөр энэ шоронгийн камерт 30 гаруй хүнийг хорьдог. Анх энэ торнуудыг 72 цаг түр саатуулах байр болгон ашиглах зориулалттай байгуулсан боловч энд бүтэн жил гаруй амьдарч байгаа хүмүүс олон байдаг.

Хоригдлууд хувцсаа нийлүүлэн оёж, дүүжин ор хийгээд, дээр дээрээ давхарлан унтдаг байна.

ОХУ-ын алдарт Хар дельфин шорон нь Казахстаны хил дагуу оршдог. Дөрвөн хоригдол 4.5 м2 талбайтай камерт хоригдоно. Гяндангууд гурван давхар төмөр хаалгатай ба 24 цагийн хараа хяналттай байдаг аж.

Шотландын HMP Аддивэл шоронгийн хоригдлууд гэмт хэрэг үйлдэх чиг хандлагаа дарахын төлөө тэмцэхэд зориулагдсан засан хүмүүжүүлэх төв юм. Гэмт хэрэгтнүүд сурч боловсорч, мэргэжлийн хүмүүсээс зөвлөгөө авахаас гадна хөдөлмөр эрхэлдэг байна.

Малави улсын Лилонгве дахь Маула шорон ёстой л хоригдлуудаар хахаж цацаж байгаа газар. 2015 оны байдлаар л гэхэд 60 хүнийг хорих багтаамжтай өрөөнд 200 хүн байгаа юм. Түүнчлэн 120 хүн тутамд нэг жорлон, 900 хүн тутамд нэг угаалтуур бий. Засгийн газраас санхүүжилт тун бага олгодог тул хоригдлуудыг өдөрт нэг л удаа хооллодог. 

Швейцарийн Женев хот дахь Чамп-Доллон шоронгийн үндсэн зориулалт нь хоригдлуудыг шүүх хурал болох хүртэл байрлуулах юм.

Гайтигийн шорон нь эрэг дагуу байрлах Аркахайе тосгонд байрладаг. Шоронгийн даац хэтэрсэн бөгөөд хоригдлуудын амьдрах нөхцөл үнэхээр тааруу. 2016 онд үүнийг эсэргүүцсэн хоригдлууд бослого гаргаж, 174 хоригдол оргосон байдаг. Энэ үеэр нэг харгалзагч амиа алдаж, хэд хэдэн хүн бэртжээ.

Япон улсын Ономичи хотод байрлах уг шорон нь өндөр настай хүмүүст зориулагдсан хорих газар юм. Тус улсын хүн амын наслалт маш өндөр болж, настай хүмүүсийн тоо их буйгаас болж зөвхөн ахмадуудад зориулагдсан шорон байгуулах шаардлагатай болсон гэдэг. Энд хоригдож буй хүмүүсийн хоол нь илүү зөөлөн байх ба босч, суухад нь туслах тусгай бариулууд суулгасан байдаг.

Норвегийн шоронгууд хоригдлуудыг засан хүмүүжүүлэхийн тулд аль болох хэвийн амьдрах орчинг үүсгэхийг зорьдог нь тодорхой. Тухайлбал, Осло хотын Скиен шоронд хоригдож буй хоригдууд өөрийн гэсэн ариун цэврийн өрөө, зурагт, видео тоглоомууд, бэлтгэл хийх газар болон зугаалах талбай руу чөлөөтэй орох боломжтой аж. Чухам энэ шоронд 2011 онд тэсрэх бөмбөгөөр 9 хүн, галт зэвсгээр 69 хүнийг хөнөөсөн масс алуурчин Андерс Бехринг Брэйвик 21 жилийн хорих ял эдэлж байгаа юм.

Ландсберг шоронд Адольф Гитлер “Mein Kampf” номоо бичсэн гэдгээр алдартай. Түүнчлэн дайны гэмт хэрэгтэй холбогдуулан 278 Нацист оффицерыг энд цаазалсан байдаг. Өдгөө уг шоронгийн нөхцөл байдал харьцангуй сайжирчээ.