Эгчийнхээ сургуулиасаа хандив цуглуулах зорилгоор хийж байсан "эмэгтэйлэг" үнэртэй лааг шоолж суусан 14 настай Харт Мэйн “эршүүд” үнэртэй лаа хийх санааг олжээ. Энэ санаагаа улам баяжуулж, өөрөөсөө 100 ам.доллар, эцэг эхээсээ 200 ам.долларын хөрөнгө оруулалт хийн эрчүүдэд зориулсан лааны үйлдвэрлэлээ эхлүүлсэн байна. Тэд үүнийг гэр бүлийн бизнес болгож, АНУ даяар зарж эхэлжээ. Түүний лаанууд задгай гал, бэйкон, модны үртэс, дөнгөж хяргасан зүлэг, өвөөгийн гаансны үнэр гэх мэт олон төрлийн үнэртэй. Одоогийн байдлаар 60 гаруй дэлгүүрт худалдаалж буй энэ лаа нэг зуны дотор 9000 ширхэг зарагдаад байна. Харт Мэйн “ManCans” нэртэй лааны бизнесээ цаашид ч өргөжүүлэх бодолтой байдаг гэнэ. 

Аав, өвөөгийнхөө энтрепренерийн замналыг дагахаар шийдсэн Шарлот ахлах сургуулиа дөнгөж төгсөөд өөрийн бизнес болох “Wound Up”-аа нээсэн юм. Калифорнид байх жижиг хэмжээний, загварлаг хувцас зардаг бутикүүдээс санаа авсан тэрбээр 18-40 насны эмэгтэйчүүдэд зориулсан хувцас худалдаалдаг. Тэдний дэлгүүрт цамц, богино өмд, банзал болон даашинз бий. Шарлот бизнесээ эхлүүлснээсээ хойш хувь хүний хувьд маш хурдан өсч томрон, илүү хариуцлагатай нэгэн болсон гэнэ. Өдөрт дунджаар 9 цаг ажилладаг тэрбээр найзууддаа ч цаг зав гаргаж амждаг аж.

Кэйн Монрой ердөө 9 настай хэдий ч аль хэдийн өөрийн бизнесээ босгосон нэгэн. Энэ хүү тоглоомны газар ажиллуулдаг. Аавынхаа автомашины сэлбэгийн дэлгүүрт цаасан хайрцгаар хийсэн тоглоомнуудаа тоглуулдаг энэ хүү дээр өдөр болгон олон хүүхдүүд ирж  үйлчлүүлдэг аж. Кэйн 1-2 ам.доллараар 4-500 удаа тоглуулдаг. Мөн “Кэйний аркэйд” гэсэн бичигтэй футболка зардаг. Одоогийн байдлаар тэрбээр зөвхөн хандиваас гэхэд 212 мянга гаруй ам.доллар босгоод байгаа аж. Түүнийг алдаршуулсан гол зүйл нь YouTube болон Vimeo дээр байршуулсан 11 минутын видео танилцуулга бөгөөд тус видеог маш олон хүн үзжээ.

Сиатл мужид амьдардаг өсвөр насны хүү Жэк Ким хандив цуглуулах зориулалттай “Benelab” гэх хайлтын системийг үүсгэн байгуулсан нэгэн. Өмнө нь хэд хэдэн хайлтын систем хийж байсан бөгөөд маш бага хэмжээний хандалтаас ашиг олох боломжтой гэдгийг ойлгосон байна. Түүний хайлтын системийн гол зорилго нь “тэтгэмжийг илүү хялбар, хүртээмжтэй” болгох гэнэ. Насанд хүрэгчдийг ажиллуулахгүй гэсэн дүрэмтэй тэрбээр ангийн нөхдөө хөлсөлж, гарааны бизнес хийх хүсэлтэй ашгийн бус багийг бүрдүүлээд байгаа аж. Сургуулиа төгсөх үед “Benelab”-аа хэрхэхээ одоогоор шийдээгүй байгаа бөгөөд хичээл дуусах үед 100 мянган ам.долларыг босгосон байх төлөвлөгөөтэй ажиллаж байгаа гэнэ. 

Флорида мужийн 14 настай Уиллоу Туфаногийн ээж үл хөдлөх хөрөнгийн салбарт ажилладаг. Энэ муж эдийн засгийн хямралын нөлөөнд хүчтэй цохигдох үед 100 мянган ам.доллараар зарагдаж байсан байшингууд дуудлага худалгаагаар арай ядан 12 мянган ам.доллараар худалдаалагддаг болжээ. Туфано зарагдаж буй байшингуудыг цэвэрлэж, хаягдаж буй эд хогшлыг Craigslist-ээр худалдаалан тодорхой хэмжээний мөнгө олсон байна. Нэг өдөр өөрийн гэсэн байшин худалдаж авах санаагаа ээждээ хэлэхэд түүнийг дэмжиж, шаардлагатай туслалцааг үзүүлсэн гэдэг. Ингээд ээж охин хоёр байшин худалдан авч, долоо хоногийн 700 ам.доллараар түрээслэх болжээ. Хөрөнгө оруулалтын зардлаа хэдийнээ нөхчихсөн Уиллоу удалгүй ээжийгээ хөлсөлж ажиллах төлөвлөгөөтэй. Өдгөө эдийн засаг сэргэж байгаа тул түүний хөрөнгө оруулалтын өгөөж маш их нэмэгдэх хандлагатай байгаа бөгөөд өргөжих боломж дүүрэн байгаа аж. Ердөө 14 настай охин гэхэд муугүй байгаа биз?

Хамгийн анх iPad-2 худалдаанд гарах гэж байхад Гаррет Жий нэгэн бизнесийн санаа бодож олсон юм. Их сургуульд элсээд байсан энэ залуу уг бүтээгдэхүүнд тохирох хамгийн шилдэг 10 аппликейшныг жагсаан бичдэг блог хүмүүсийг шууруулна гэж таамагласан юм. Ингээд ашиглахад хялбар, нүсэр биш QR код унших чадалтай програм, аппликейшны хэрэгцээ гарна гэж үзэн iPad-2-т зориулсан тийм бүтээгдэхүүн санал болгох анхны хүн нь болох зорилго тавьжээ. Шинэ бүтээгдэхүүн гарсан даруйд худалдан авч, iOS хөгжүүлэгчдээ өгөн, хоёр долоо хоногийн турш унтахгүй ажилласаар зорилгодоо хүрч чадав. Блогийн талаарх таамаглал нь ч зөв байж, шилдэг 10 аппликэйшны жагсаалтанд өөрийнийгөө оруулж чадсан байдаг. Ангийнхаа хоёр найзыг эгнээндээ элсүүлж, 2011 оны 2-р сар гэхэд “Scan” гэх аппликэйшнээ танилцуулав. Зөвхөн хөрөнгө оруулагчдаас гэхэд 1.5 сая ам.долларын хөрөнгө босгож чадсан энэ багийн бүтээгдэхүүнийг эхний жилд нь гэхэд 21 сая удаа татан авсан амжилтыг үзүүлжээ.

Ердөө 9 настай байхаасаа л эцэг эхийнхээ амралтанд зориулан жижигхэн зүйл зохион бүтээж эхэлсэн Камерон Жонсон 2 жилийн дараа гэхэд “Cheers and Tears” гэх компанийнхаа ил захидлын борлуулалтаас мянга мянган ам.долларын орлого олж эхэлжээ. Тэрбээр 12 настай байхдаа эгчээсээ авсан Beanie Babies гэх чихмэл тоглоомуудыг 100 ам.доллараар худалдан авч, eBay дээр 10 дахин үнээр зарсан байдаг. Үүний дараа энэ тоглоомуудыг шууд үйлдвэрлэгчээс нь худалдан авсан ба тэр жилдээ 50 мянган ам.долларын цэвэр ашигтай ажиллажээ. Энэ мөнгөөрөө сард 3000 ам.долларыг зөвхөн сурталчилгаанаас олдог интернэт бизнес эхлүүлсэн аж. Одоо 15 настай хүү сард нийт 300-400 мянган ам.долларын ашиг авчирдаг хэд хэдэн бизнесийг эзэмшдэг юм.

Катерин Күүк 15 настайдаа ахтайгаа сургуулийн төгсөлтийн ном (монтаж) үзэж сууж байгаад уг номыг онлайнд байршуулан, үүн дээрээ тулгуурласан олон нийтийн сүлжээ бүхий цахим хуудас нээх санааг олсон юм. Түүний бүтээсэн MyYearbook.com сайт удалгүй сурталчилгаанаас мөнгө олдог вэбсайттай нийлж, хэрэглэгчдэд хүссэн зүйлээ постлохын хажуугаар онлайнаар мэдлэг шалгасан тоглоом тоглуулдаг болсон ажээ. Тэдний бизнес 2006 он гэхэд 4.1 сая ам.долларын хөрөнгө оруулалтыг босгон, дэлхий даяар 3 сая гишүүнтэй болсон байлаа. Сурталчилгаагаа байршуулах хүсэлтэй компаниудын дунд Disney болон ABC зэрэг аварга корпорациуд ч байсан юм. Өдгөө жилд хамгийн багадаа нэг сая ам.долларын орлого олдог Күүкс боломжийг олж харан, цаг алдалгүй хөдөлсөнийхөө үр дүнд амжилттай, залуу бизнесмэн болжээ.

Сард 70 мянган ам.долларын ашигтай ажиллах бизнесээ эхлэхэд Куаллс ердөө 8 доллар зарцуулсан юм. Facebook-ийн өмнө MySpace дэлхий даяар эрэлт хэрэгцээ ихтэй байх үед Эшлигийн MySpace-ийн хуудасны загварлаг байдлыг олон хүн магтдаг байжээ. Энэ чадвараа ашиглан сар бүр MySpace-ийн хуудасны загвар бүтээн, онлайнд худалдаалах болов. Түүний загваруудыг сард 7 сая хүн үзэж, 70 мянган ам.долларын ашиг оруулах болсон юм. Хангалттай их мөнгө олж байсан тэрбээр сургуулиасаа гарч, энэ бизнесээ улам өргөжүүлэхийн тулд бүтэн цагаар ажиллаж эхэлсэн байдаг. Эшлигийн амжилттай яваа бизнесийг хөрөнгө оруулагч компани 1.5 сая ам.доллараар худалдан авах санал ирж байсан ч татгалзсан гэдэг. 

Эмээгийнхээ жороор жимсний чанамал хийж зардаг болох үедээ Доэрти 14 настай байжээ. Түүний бизнес асар амжилттай болж, Доэртид өдрөөс өдөрт нэмэгдэж буй эрэлтийг гүйцэт ханган нийлүүлэх бололцоо байхгүй байлаа. Тэрбээр сургуулиа орхин сар бүрийн хэдэн өдөрт 200 хүнтэй томоохон үйлдвэр хөлсөлж, тусгай жороороо чанамалаа хийж эхэлсэн юм. 2007 он гэхэд Их Британийн өндөр зэрэглэлийн супермаркетын сүлжээ компани Доэртид хандан, бүтээгдэхүүнийг нь зарах санал ирүүлснээр түүний бизнес нэг мөр хөлөө олжээ. Шинэ хамтын ажиллагааны ачаар түүний чанамал 184 дэлгүүрийн тавиур дээр тавигдах боломжтой болсон юм. Компани нь 2007 он гэхэд 750 мянган ам.долларын орлого олсон ба одоо хүртэл Европ даяар өргөжин тэлсээр байгаа аж.