Нэрт зохион бүтээгч, инженер Никола Теслагийн энэ зургийг 1943 оны нэгдүгээр сарын 1-ний өдөр авчээ. Тэр үүнээс ердөө дөрвөн өдрийн дараа Нью-Йоркийн "Нью-Йоркер" зочид буудал дахь өрөөнийхөө хаалганы бариул дээр "Бүү саад бол" гэсэн бичиг өлгөөд нам жим болсон байна. Түүнийг хоёр хоногийн дараа буюу нэгдүгээр сарын 7-ны өдөр үйлчлэгч эмэгтэй нас барсан байхыг нь олжээ. Тэр 86 настай байлаа. 

Америкийн уран зохиолын эцэг гэгддэг Самуэл Клеменс буюу Марк Твен 1835 онд Халлейн сүүлт од үзэгдсэний дараахан мэндэлсэн байдаг. Тэрээр зохиолч болсныхоо дараа мөнөөх сүүлт одтой хамт "буцах" тухайгаа зөгнөн бичжээ. Энэ нь ч ёсоор болсон бөгөөд Марк Твен Халлейн сүүлт од дахин үзэгдсэний дараа өдөр буюу 1910 оны дөрөвдүгээр сарын 21-ний өдөр таалал төгссөн байна. Энэ зургийг түүнийг нас барахаас хэдхэн өдрийн өмнө гэрийнх нь ойролцоо авчээ. 

Францын нэрт гэрэл зурагчин Анри-Картье Брессон Энэтхэгийн тусгаар тогтнолын эцгийн сүүлчийн гэрэл зургийг алагдахынх нь өмнөх өдөр авчээ. Тэрээр 1948 оны нэгдүгээр сарын 30-нд хиндү шашинт хэт үзэлтний гарт амиа алдсан билээ. Ганди 78 насалсан юм. 

Алуурчны гарт амиа алдсан өөр нэг алдартан бол Жон Леннон. Тэрээр Манхэттен дэх байрныхаа үүдэнд энэхүү зургийн баруун буланд харагдаж буй Марк Чепмэнд гарын үсгээ зурж өгчихөөд гэртээ оржээ. Гэтэл түүнийг хэдэн цагийн дараа гэрээсээ гарахад Чепмэн ар нуруунд нь дөрвөн удаа буудаж, түүнийг хөнөөсөн байна.  

Сараево хотод төрийн айлчлал хийж байсан Австри-Унгарын эзэнт гүрний угсаа залгамжлах хунтайж Франц Фердинанд болон түүний эхнэрийг энэхүү зураг дарагдсанаас хэдхэн хормын дараа "Хар гар" хэмээх террорист бүлэглэлийн гишүүн буудан хөнөөжээ. Энэ нь дэлхийн 1-р дайн дэгдэх шалтгаан болсон юм. 

Рок-н-роллын хааны сүүлчийн гэрэл зураг. Энэ зургийг 1977 оны наймдугаар сарын 16-нд шөнийн 12 цаг 28 минутад авчээ. Элвис Пресли шүдний эмч Лестер Хофмантайгаа уулзчихаад харьж явж. Тэр мөн өдрийнхөө бага үдэд нас барсан байна. Элвис 42 насалсан.

Владимир Ильичийн хамгийн сүүлчийн гэрэл зураг. Октябрийн хувьсгалын эцэг 1924 оны нэгдүгээр сарын 21-нд нас барсан юм. 

Мэрилин Монро жазз төгөлдөр хуурч Бадди Грекогийн хамт. 1962 оны наймдугаар сар. Монро энэ зургаа авахуулснаас гурав хоногийн дараа, наймдугаар сарын 5-ны өдөр нойрны эм хэтрүүлэн хэрэглэсэн гэсэн оноштойгоор амьсгал хураасан байдалтай олдсон юм. Тэр 36-тай байлаа. 

1968 оны дөрөвдүгээр сарын 4. Хүний эрхийн төлөө тэмцэгч, Америкийн өнгөт арьстнуудын эрхийг хамгаалагч Мартин Лютер Кингийн алуурчны суманд оногдон амиа алдсан мөч. Эхний зурагт түүний дэргэд зогсож байсан найз нөхөд, хамтрагчид нь дараагийн зурагт мэргэн буучийн хаанаас буудсаныг зааж байгаа нь. 

Гитлерийн сүүлчийн гэрэл зураг гэгддэг энэ зургийг 1945 оны дөрөвдүгээр сарын 28-ны өдөр авчээ. Тэр хоёр хоногийн дараа, дөрөвдүгээр сарын 30-нд Улаан арми айсуй сургаар цианид ууж амиа хорлосон билээ.