Нуруунаасаа дулаан байж, гараа үрж бүлээцүүлэн ууц бүсэлхийгээ байнга илэх нь нуруугаар хөшиж өвдөх, хуян хөөрөх зэрэг зовуурийг эдгээдэг. Энэ дасгалыг өглөө орноосоо босохын өмнө хийж хэвшээрэй. Орноосоо гэнэт ухасхийн босох нь бөөр давсаг, хэвлийн хөндийн үйл ажиллагаанд сөрөг нөлөөтэйг сана.

Хөдөлгөөнгүй удаан сууж бие хөшин чилээрхсэн үед гар, хөлөө урагш, хойш савчин хөдөлгөж, булчин шөрмөсөө тэнийлгэх хэрэгтэй. Мөн бүсэлхий, ууц нуруугаараа нэг бөхийж, нэг гэдийн хуян шар усаа тараа. Хөлөө шагайны үеэр эргүүлэн хөдөлгөхөд хөлийн булчин чангарч, венийн судасны эргэлт сайжирч, үе мөчөөр шархирч өвдөхийг намдаадаг. Боломж байвал өдрийн цагаар хэсэг зуур ч болов гутлаа тайлаад хөлийн улаа илж байгаарай.

Гүн амьсгаа авах нь уушгины бохир агаарыг гадагшлуулж, уушгины үйл ажиллагааг дэмжин, цусанд агуулагдах хүчилтөрөгчийн хэмжээг нэмэгдүүлж, цусны эргэлтийг сайжруулдаг. Мөн цус багатай хүмүүсийн цус төлжилтийг дэмжинэ. Энэ дасгалыг эрүүл агаарт 15 минутаар 10 хүртэлх удаа хоёр сарын турш хийхэд л үр дүн нь аяндаа мэдрэгдэнэ.

Хоёр гарынхаа алгаар чихээ таглан, долоовор хуруугаараа дунд хуруун дээрээ товшин чихний ар дагзанд 16-36 удаа зөөлөн товш. Энэ нь ой санамж, сонсгол сайжруулахад тустай бөгөөд толгой эргэх, өвдөх, чих шуугих, үрэвсэхээс сэргийлдэг.

Хооллохын өмнө уруулаа жимийн, шүдээ зуугаад зөөлөн хавирах буюу товшиход шүд бэхжин, шүдний өвчнөөс сэргийлдэг.

Хэлний үзүүрийг тагнайдаа хүргэн эргэлдүүлэхэд амны хөндийд шүлс ялгаран хуримтлагдана. Энэ нь хоолны дуршлыг нэмэгдүүлж, шингэцэд эерэгээр нөлөөлөн ам цангах, залгиур хоолой, буйлны үрэвсэл зэргээс сэргийлдэг.

Дээрхтэй төстэй. Гэхдээ хэлээ хөдөлгөлгүй амаа жимийн удаан байхад хуримтлагдах шүлсээ залгидгаараа тагнайдаа хэлээ хүргэх дасгалаас ондоо. Энэ дасгалыг хийхдээ нэг удаад шүлсээ 10 удаа залгих ба энэ нь хоолны шингэц, биеийн эсэргүүцэл сайжруулна.

Нүдээ нар зөв болон нар буруу эргэлдүүлж, мөн дээш, доош, баруун, зүүн тийш тус бүр нь 10-14 удаа хөдөлгөх нь нүдний чилээ, ядаргаа арилгадаг. Мөн нүд эрээлжлэх, хараа муудах, үүл буух эмгэгээс сэргийлнэ.

Суниахад биеийн ихэнх булчин чангарч, цусны эргэлт, зүрхний цусан хангамж сайжирдаг. Мөн булчингийн цусны эргэлт, бодисын солилцоо сайжирч, биеийн чилээ, ядаргаа арилан тайвширна. Харин эвшээлгэх нь уушгины үйл ажиллагааг дэмжиж цээж давчдах, багтрах, бүгшүүлэн ханиалгахаас сэргийлнэ.

Үсээ самнах буюу гарын 10 хуруугаар хуйхаа урагш, хойш илэх нь толгойн хэсгийн мэдрэлийн судсыг өдөөж, мэдрэлийн чадавх, цусны эргэлт, бодисын солилцоог сайжруулдаг. Даралт унах, нойр хулжих, толгой эргэх, хуйх загатнах, үс унах, бууралтах, зүрх дэлсэх зэрэг олон эмгэг, зовууриас сэргийлье гэвэл өдөр бүр 3-5 минут үсээ самнаж, илж байгаарай.